اراء و معتقدات
لو لسه مش عارف اللي بيحصل في كوكبنا… أنا هافهمك بالبلدي | مع المصري افندي
صباح الخير/ مساء الخير…..
لو إنت لسه مش عارف اللي بيحصل ف الكوكب…
ولو انتي مش عارفة اللي بيحصل ف كوكبنا…
ف خليني أقولكوا….
ومطولش عليكوا وقولولي طول…. علشان هطول
♦️إيران…..
آه تاني إيران….
طهران بتقول إن بدأ العد التنازلي للإتفاق الإيراني ……
طب الحمد لله جبرت كدا
بس مش دي المشكلة ف الإتفاق ده ولا المشكلة كانت ف الإتفاق السابق…
المشكلة كانت حسب ما قاله المتحدث الرسمي الإيراني إمبارح……
إن امريكا ف الإتفاق النووي السابق ترامب حس إنه إنضحك على أمريكا وما أخدوش حاجة من كحكة الإقتصاد الإيراني وإن الإقتصاد الإيراني إتقسم نصين بين الصين و روسيا وأمريكا طلعت من المولد بلا حمص علشان كدا ترامب كان بجح و قالهم …… مش لاعب وامكوا على ام اللي جابكوا وهنسحب ..وأمريكا انسحبت رسميا سنة ٢٠١٦
وقال برضوا المتحدث الرسمي الإيراني..
ان خلاص اوشكنا ان نتفق ونقلل الخلافات وامريكا خلاص إتعشت معاها كدا وجبرت…
يعني ولا كانت قصة نووي ولا ذري طول السنين دي…
دول كانوا بيحلبوا الخليج…..
ولما الخليج حط ايده ف ايد مصر ومصر قالت امن الخليج من امن مصر….قلبهم جمد وقال لااااا خلاص كدا….
بطلنا اللي يعطلنا وخلاص مش هناكل على قفانا تاني …
ومصر واقفة ف ضهرنا واللي هنلمحه… هنمرجحة..!!
ف الامريكان راحوا يقلبوا الإيرانيين فكام مليون برميل بترول ع الماشي على كام مليار دولار كدا….
يااخونا الصراع ف العالم كله….. كله حرفيا عالطاقة
مش على دين ولا لون ولا عرق ولا هبل من ده
الصراع ف العالم كله على الطاقة
شوية الصراع ده ياخد شكل دين
و شوية تانيين ياخد شكل عنصري
وشويه تانيين ياخدوا شكل عرقي
بس ف الآخر هو صراع على الطاقة…
وع الناحية التانية من الكوكب……
♦️تركيا…
حبيب قلبي والله …
بركة الكوكب ….وخادم المثليين النجسين أردوغان…
فاجئ كل الشعب التركي والمصري اللي هو حرفيا متابع سعر الليرة بس محدش اخد باله من حاجة تانية خالص ….
اردوغان إمبارح حرفيا قلع الشعب التركي ملط وسابه يجري ف الظلام…
أردوغان رفع إمبارح للمرة التانيه فشهرين سعر الوقود ف تركيا بنسبة ١٥٠٪
يعني ….. مممممم
شوف حضرتك تخيل كدا ان البنزين كان ف آخر شهر اكتوبر اللي فات ب ١٥ ليرة هوب بقا ب ٣٠ ليرة …. والشعب التركي قال ل لأردوغان ماشي ياعم حارب الربا والشيطان براحتك وإحنا وراك….. هما فعلا هيكونوا ورااه …بس معرفش الصراحة هيعملوا ايه!!
علشان إمبارح البنزين بقا هوب دبل كيك ب ٦٧ ليرة مرة واحدة…… دا سعر رسمي من الدولة
يعني بعد الشر …. بعد الشر وتفي من بوقك والشر بره وبعيد وإمسكي الخشب ياختي
تبقي نايمة ف آمان الله والبنزين ب ٧ جنيه تصحي الصبح تلاقيه ب ١٥ جنيه وف آخر الشهر مع القبض تلاقيه ب ٣٠ جنيه وهوب دبل كيك واخوتنا المسيحيين بيعيدوا نلاقيه ب ٦٧ جنيه للتر البنزين..
تخيلت معايا الكارثة حضرتك …!!!
وع الناحية التانية من الكوكب…..
♦️الإمارات….
الإمارات بتعمل مناورات بحرية وبرية شاملة وبكامل افرع أسلحة جيشها فنفس الوقت اللي إسرائيل بتعمل مناورات ضخمة على هضبة الجولان بتحاكي حرب شاملة على حزب الله لإبادته من الوجود…
ف الوقت اللي السعودية غارزة ف اليمن
ف الوقت اللي قطر عاملة ودن من طين وودن من عاجين وبتقول ياخونا انا مش فاضية علشان هنظم كأس العالم….
وع الناحية التانية من الكوكب….
♦️كازاخستان…
أمريكا مش عارفة تفلفص من روسيا ف أوكرانيا قامت ولعت الدنيا ف كازاخستان على حدود روسيا ….ولعت الدنيا فعلا وعملت انقلاب وثورة كمان
كل ده علشان بايدن لما يقعد مع بوتين تاني يقوله سيب وانا اسيب
نفس اللي حصل عندك لما لقاك سيطرت على ليبيا ومعرفش يفلفص منك راح مولعلك السودان تحت علشان يشتتك ويقعد بقا ف المفاوضات ويقولك سيب وانا اسيب
واللي نفسه طويل هو اللي هيكسب
وع الناحية التانية من الكوكب…
♦️أثيوبيا….
أول خبر جاي من هناك بس مش من أثيوبيا يعني طاير حاير جاي من السعودية …
السعودية قبضت على ٤٠ ألف اثيوبي ورحلتهم ….. قال إيه دخلوا واشتغلوا بطريق غير شرعي
دا مش كدا وبس دا في نص مليون أثيوبي واثيوبية السعودية هتدرس موقفهم القانوني ف المملكة واحتمال ترحلهم ….
خد بالك دول كانوا بيدخلوا عملة صعبة لبلدهم وبيدعموا اقتصادهم الاثيوبي فلما ترحلهم… !!
شوف انت بقا هيحصل إيه!!
المهم يعني طلع الموكوس آبي أحمد وقالك إحنا على إستعداد إستقبال مليون أثيوبي وهنشغلهم … بس معرفش الصراحة هيشغلهم ف إيه إلا إذا كان هيدخلوا الجيش ويحاربوا…
ومش دا كلا
مي على فكرة….
دا كلام الجارديان البريطانية قالت ان ال٤٠ الف اثيوبي اللي رحلتهم السعودية إختفوا تماما ودخلوا الحرب مع التيجراي
مهو البلد مفيهاش إقتصاد أصلا لمدة ١٠ سنين علشان كدا مصر مبتجيبش سيرتهم اصلا لا بخير ولا بشر…..
عرفتوا بقا ان السعودية ومصر والامارات بيلعبوا چييم عالي جدا ..
طب الموكوس آبي أحمد يسكت على كدا … أبدا
راح زار سد النهضة فحركة إستفزازية لمصر وتفقد التوربينات وقال هنولد آهه …. بس الصراحة ماقلش هيولد إمتى ولا ف الشهر الكام علشان هما محسبوش من الاسبوع الاول ولا حتى كانوا عارفين بيتوحم على إيه !!
وع الناحية التانية من الكوكب….
♦️كوكب تحيا مصر…
قناة Rt الروسية منزلة خبر وبتسأل…
ما هو السر وراء بناء ٧ مخازن إستراتيجية عملاقة بأمر مباشر من السيسي….
الخبر بيقول ان السيسي وجه الحكومة إنها ترفع الإحتياطي الإستراتيجي من السلع الاستراتيجية زي القمح والسكر واللحوم والزيت وكدا بدل ما هو يكفي ٣ شهور يكون ٨ شهور…
انت متخيلين الفرق!!!
المفروض الإحتياطي الإستراتيجي من السلع لو في أزمة او مصيبة اوكارثة أو حرب بيكفي مصر ٣ شهور….. السيسي طلب بقا انه يزيد ل ٨ شهور ويتبني مخزن عملاق فكل محافظة
ودا اللي مخلي كل وسائل الاعلام العالمية تسأل هو السيسي بيعمل إيه ف مصر !!
♦️كمان ف كوكب تحيا مصر….
ال BBc عاملة تقرير وبتقول فيه….
عارفين أفخم العطور والبارفانات الفرنسية العالمية اللي هية جاية من باريس اصلها إيه ..!!!
شبرا بالولة…. ايون قرية صغيرة فمصر اسمها شبرا بالولة فمحافظة الغربية…
شبرا بالولة بتنتج نص إنتاج العالم من عجينة الياسمين اللي بيدخل فتركيبة أفخم البارفانات العالمية
والبي بي سي بتقول ان المنافس الوحيد للقارية دي هي الهند
إنت متخيل إن عندنا قرية بتانفس دولة زي الهند والعالم كله لوحدها فالإنتاج….!!
♦️وف كوكب تحيا مصر….
خلاص هيبتدي منتدى شباب العالم ف شرم الشيخ…
والمنتدى ده بيضم شباب من كل الدول ووفود من كل الدول….
طبعا في ناس من الشباب دول من مصر او من بره مصر بيكون توجههم ضد مثلا النظام المصري او حتى آرشين ملحة مصر …
هقولك أنا …. ما طبعا لازم يكون في تنوع وفي اختلاف ايدولوجي وبالعكس دا انت لازم تدور على اللي مختلفين معاك فكريا وايدلوجيا و توريهم رؤية مصر من وجهة نظرك و توريهم انت عملت ايه ف الخرابة اللي كنت واخدها
لازم توريهم مصر بعينك انت مش بعنيهم هما….
مهو مينفعش تبقا زي الحزب الوطني و زي الإخوان زمان كانوا بيعملوا مؤتمرات وتوصيات لنفسهم ومبيسمعوش غير نفسهم
أهو مؤتمرات الحزب الوطني دي كانت زي الفرح اللي كله طرش
ولا حتى مؤتمرات الإخوان كانت كلها معيز بتمأمأ
ف إنت بتجيب الشباب من كل العالم وبتسمعهم وبتعرض وجهة نظرك وتشرحلهم رؤيتك وبيشوفوا مصر بعنيهم ف بيرجعوا سفراء لبلادهم
حتى الشباب المصري اللي مختلف معاك فكريا لنا بيشوف بعنية اللي بيحصل بيتغير وفكرتة عن النظام بتتغير
المؤتمر ده مش معمول للي بيطبلوا للنظام لا بالعكس هو معمول للي مختلف معاك علشان تناقشة فكريا
اللي فكر ف فكرة المنتدى ده عبقري..
كفاية كدا وقعدوا بالعافية…..🤍🤍
»بيعيرونا بفقرنا……. بس أنا مش هسكت«
عبدالفتاح السيسي
والسلام عليكم ورحمة الله وبركاته
تحيا مصر
تحيا مصر
تحيا مصر
بقلم: محمد نظيم
للإبلاغ عن فيديو لا يعمل.. اضغط هنا للعودة اكتب فى جوجل: موقع Hayeil
شاهد أحدث المسلسلات والأفلام- من هنا
